Животот на Австријците значително поскапе. Земјата се бори со инфлација највисока во изминатите 47 години. Во јуни таа достигна рекордни 8,7%, најмногу поради зголемените цени на горивата, намирниците, струјата и на угостителските услуги. Потрошувачка кошничка се зголемила за 19%. Дизел-горивото во јуни, споредбено со истиот период лани, е зголемено за неверојатни 65%, а бензините за 61%, покажуваат официјалните податоци на Статистичкиот завод на Австрија.
И Канада се соочува со најголемата инфлација што е забележана во изминатите 40 години. Индексот на потрошувачките цени достигна 8,1% на годишно ниво во јуни, по растот од 7,7% во мај, покажуваат податоците на агенцијата за статистика на земјата, каде што се додава дека овој пораст не е забележан од јануари 1983 година.
Порастот во јуни главно се должи на повисоките цени на бензините, кои се зголемија за неверојатни 54,6% на годишно ниво, објаснува агенцијата за статистика. Платите на вработените се зголемени за 5,2% но сепак не успеале да ја достигнат инфлацијата.
Иако за Канада овој процент на инфлација е значителен, таа сепак има пониска стапка од САД, каде што е забележана инфлација од 9,1%, како и од Обединетото Кралство со инфлација од 9,4%.
Инаку во еврозоната инфлацијата била 8,6%, а се зголемува во сите земји. Највисоки годишни стапки на инфлација се забележани во Естонија од 22%, Латвија 20,5%, а најниски во Малта од 6,1% и во Франција од 6,5%.
