ДРАГ КОЛЕГА,
ВЧЕРА НЀ ЗАТЕЧЕ НЕПОДГОТВЕНИ! ТЕ ЧЕКАВМЕ НА УТРИНСКОТО КАФЕ ПРЕД ДА ПОЧНЕМЕ СО ЧАСОВИТЕ И ДЕНОТ, А НАМЕСТО ТЕБЕ, НИ ПРИСТИГНА ТАЖНАТА ВЕСТ ЗА ТВОЕТО НЕОЧЕКУВАНО ЗАМИНУВАЊЕ! НЀ ОСТАВИ СО ГОЛЕМА ПРАЗНИНА ТАМУ КАДЕ ШТО БЕШЕ ТИ, ВО НАШИТЕ СРЦА, ВО УЧИЛНИЦИТЕ НА УНИВЕРЗИТЕТОТ! ЌЕ ГО ПАМЕТИМЕ ВЧЕРАШНИОТ ДЕН, 16 ДЕКЕМВРИ, ВО СПОМЕН НА СИТЕ ПРЕКРАСНИ ДЕНОВИ И ПРЕДИЗВИЦИ ШТО ГИ ПОМИНАВМЕ ЗАЕДНО!
НЕКА ТИ Е СВЕТОЛ ПАТОТ ВО ВЕЧНОСТА!
ОД РЕКТОРОТ, ВРАБОТЕНИТЕ И СТУДЕНТИТЕ НА
УНИВЕРЗИТЕТОТ СКОПЈЕ
На 16 декември 2024 година, само 12 дена пред неговиот роденден, неочекувано нѐ напушти нашиот драг колега проф. д-р Сашо Кожухаров, декан на Економскиот факултет на Универзитетот Скопје.
Нашиот декан и професор остави траен печат во науката, образованието и на сите нас кои имавме привилегија да го познаваме, а особено врз младите кои поминаа низ студентските клупи на нашиот универзитет. Во чест на неговото дело, на 20 декември, во Амфитеатарот на Универзитетот Скопје, се одржа Комеморативна седница.
Роден на 28 декември 1960 година, проф. Кожухаров уште од најрана возраст покажува интерес за знаење, трудољубивост и успех.
Своето образование го започнува на Универзитетот „Св. Кирил и Методиј“ во Скопје, каде што со огромна посветеност ги стекнува титулите дипломиран економист (1984), а потоа и магистер по деловна економија (1996) и доктор на финансиски, сметководствен и трошочен менаџмент (2000), поставувајќи ги темелите на својата успешна кариера, која потоа ќе се протега низ повеќе континенти, индустрии и академски дисциплини.
Кариерниот живот на проф. Сашо Кожухаров е вистинско патешествие низ широк спектар на професионални улоги и институции. Својот професионален пат проф. д-р Сашо Кожухаров го започнува во стопанството, каде што веднаш блеснува неговата вродена дарба за лидерство и организација. Во 1986 година, со само 26 години, ја презема функцијата Директор на финансии во „ЕМО – Охрид“. Со непоколеблива прецизност и визија, тој успеваа да воведе ред во финансиските операции на компанијата, оставајќи траен белег во нејзината историја. Колегите и соработниците го опишуваат како човек кој не само што управувал со бројките, туку и со срцата на оние околу него, инспирирајќи ги со својот ентузијазам и професионализам.
Неговата амбиција и љубопитност го водат далеку од границите на Македонија. Во 1991 година, во еден сосема поинаков контекст, ја презема функцијата финансиски директор на „Електромонтажа ДОО“ во Лагос, Нигерија. Таму, во еден од најдинамичните и најнепредвидливите пазари, тој со успех управува со финансиските операции, покажувајќи дека неговата компетенција и способност немаат граници. Среде амбиент на културни и деловни разлики, тој успева да воспостави ред, стабилност и доверба, будејќи длабока почит меѓу локалните и меѓународните соработници.
По враќањето во Македонија, проф. Кожухаров ја продолжува својата блескава кариера, преземајќи значајни менаџерски позиции во неколку реномирани компании. Како директор на финансии во „Технометал Вардар“ за проектот Запорожје во Украина, директор на „Тобачна промет“ и „Тутунски комбинат“, како и извршен директор на „АСК – Штип“, тој постојано воведува иновации и обезбедува стабилност во работата на овие компании. Но, неговата вистинска моќ не се огледува само во неговата експертиза, туку и во способноста да ги инспирира и да ги едуцира тимовите со кои работи.
И покрај големите успеси во стопанството, најголемата страст на проф. Кожухаров отсекогаш била образованието. Со богатото искуство што го стекнува во деловниот свет, проф. Кожухаров ѝ се посветува на академската заедница, пренесувајќи им ги своите знаења и вештини на идните генерации: во предавалните на универзитетите „Гоце Делчев“ – Штип, на Европскиот универзитет, на Универзитетот ФОН, а најзначаен белег остава на Универзитетот Скопје, каде што беше професор, декан и проректор за наука и развој.
Во овие улоги, проф. Кожухаров не беше само лидер, туку и визионер. Со својата енергија и ентузијазам, тој ги инспирираше своите колеги и студенти, претворајќи ги во носители на прогресот и знаењето. Неговите предавања беа повеќе од пренесување информации – тие беа поттик за размислување, анализа и креативност. Во научниот свет, проф. Кожухаров остави огромно наследство. Автор е на повеќе од триесет универзитетски учебници и монографии, меѓу кои „Трошоци и инвестиции во менаџерската економија“ и „Современо финансиско сметководство“. Неговите научни трудови, објавени во реномирани домашни и меѓународни списанија, опфаќаат широк спектар на теми, вклучувајќи стратегиски менаџмент, финансиско планирање и меѓународен бизнис. Тој беше неуморен патник, носејќи го македонското знаење на многубројни меѓународни конференции и симпозиуми. Неговата стручност беше признаена и почитувана, но она што го правеше уникатен беше неговата способност да го спои академскиот и човечкиот аспект, оставајќи зад себе траен впечаток.
Затоа што, пред сè и над сè, проф. Кожухаров беше човек кој ги ценеше луѓето и ги ставаше нивните потреби и благосостојба на прво место. Беше познат по својата искрена грижа за своите студенти, колеги и пријатели. Неговиот кабинет секогаш беше отворен за сите кои имаа потреба од совет, поддршка или едноставно добар збор. Ќе се сеќаваме на него не само како научник и педагог, туку и како голем човек. Неговата мудрост, добрина и неизмерна љубов кон образованието, науката и луѓето ќе продолжат да живеат во сите нас.
Твојот живот беше инспирација, твоето дело – бесмртно. Почивај во мир, драги професоре, со благодарност од сите нас кои те познававме и те сакавме!
Нека му е вечна славата!
