Њујорк и Сингапур го делат првото место на врвот на листата на најскапи градови во светот во 2022 година, а минатогодишниот лидер Тел Авив сега е на третото место.
Податоците се објавени во годишното истражување на глобалните трошоци за живот спроведено од „Економист интелиџенс јунит“.
Градот на големото јаболко за прв пат се најде на врвот на листата, додека Сингапур по осми пат е лидер на листата во последните 10 години.
Двата града се најдоа на врвот на листата пред сѐ поради удвојувањето на цените на енергијата во големите градови.
Најголем напредок на листата имаат американските градови, од кои дури шест се најдоа во првите 10. Покрај Њујорк, на листата десет најскапи града се најдоа и Лос Анџелес и Сан Франциско. Сите 22 американски града што биле дел од истражувањето годинава напредувале на оваа листа пред сѐ поради брзиот раст на цените и зајакнатата вредност на доларот. Шест од нив, Атланта, Шарлот, Индијанаполис, Сан Диего и Бостон се меѓу 10-те градови што покажале најголем скок на листата.
Израелскиот град Тел Авив, кој во 2021 година беше прогласен за најскап град во светот, годинава се најде на третото место.
Во рангирањето најголем напредок има кај руските градови Москва и Санкт Петерсбург. кои се искачија за 88, односно 70 места погоре.
Од друга страна, на листата паднаа и градовите во земјите каде што валутите забележаа пад, а Токио и Осака од 13-то и 10-то место во 2021 година паднаа на 37-мо и 43-то.
Пад има кај повеќето европски градови. Според „Гардијан“, најголем пад на листата во Европа е забележан кај Стокхолм и кај Луксембург.
Сирискиот главен град Дамаск и либискиот Триполи остануваат најевтини градови во светот.
„Ако не ескалира војната во Украина, предвидуваме дека цените на храната, енергијата и на суровините како што се металите, најверојатно нагло ќе паднат во 2023 година во споредба со тековната година, што може да предизвика пад на трошоците за живот во градовите“, се наведува во истражувањето.
Истражувањето оваа година, беше спроведено од 16 август до 16 септември во 172 поголеми града во светот.
