Бегалците од војната во Украина се очекува да ја зголемат активната работна сила во еврозоната до 1,3 милиони луѓе. Ова го пишува Европската централна банка во економскиот билтен.
Грубите процени укажуваат на пораст од 0,2% до 0,8% на среден рок, се вели во соопштението. Тоа е меѓу 0,3 и 1,3 милиони луѓе.
Експертите посочуваат дека ако бегалците успеат да најдат работа без долг процес на интеграција, тие може да му помогнат на пазарот да одговори на сегашната оптимистичка побарувачка за работна сила и да се справи со зголемениот недостиг од луѓе со квалификации.
Покрај последиците за луѓето од руската инвазија на Украина, војната предизвика и трајна штета за економијата на еврозоната. ЕЦБ очекува таа да порасне за само 2,8% оваа година.
Регионот веќе се соочува со проблемот на брзо стареење на населението, што го намалува уделот на работоспособни луѓе. Недоволниот капацитет на пазарот на трудот е значаен предизвик за компаниите. Дури 27% од бизнисите ги наведуваат вработените како главен фактор што ја ограничува продуктивноста, се вели во една неодамнешна студија на Европската комисија.
Извештајот на ЕЦБ смета дека украинските бегалци ќе можат да се интегрираат на пазарот на труд побрзо од претходните бранови сириски бегалци поради поголемата релативна културна блискост и брзата реакција на Европската Унија. Сепак, Централната банка предупредува дека големата неизвесност околу идниот тек на војната го отежнува прецизното проценување на можните последици.
