Граѓаните ќе живеат подобро, повисоки плати и подобра иднина за бизнисот

Во 2025 година нѐ очекува стабилна економија со повисоки плати, инвестициски бум и економски развој. Сето искреирано од палката на Министерството за финансии, чуварот на државните пари. Годинава наследија трошоци и договорени проекти, но за идната, фактурите ќе ги креираат со поинакво темпо. Министерката Гордана Димитриевска-Кочоска вели дека економијата е нејзиниот приоритет и оти буџетот за 2025 година ветува поквалитетен животен стандард за граѓаните. Се обврзува на економска трансформација и ветува раст на БДП, но и нови странски директни инвестиции кои ќе генерираат раст и развој. 

„За жал, многу од проектите што ги наследивме и за кои очекувавме дека ќе има реализација, ги прекинуваме во овој период поради објективни проблеми. Како на пример, се раскинува договор поради откриена фалсификувана банкарска гаранција“, рече министерката и додаде дека кај одредени проекти има и забрзана динамика.

Очекува годината да се заврши со реализација на околу 550 милиони евра капитални инвестиции. Тоа е околу 70% од планираното. Но, важно е дека станува збор за реализација на реални капитални инвестиции.

„Во 2021 година реализацијата на капиталните расходи изнесувала 400 милиони евра, во 2022 година 450 милиони евра, а во 2023 година 700 милиони евра. Но, во овие средства влегуваат и трансферите кон ЕСМ, од кои потоа беа исплаќани плати, како и авансни плаќања за одредени проекти. Оваа година ќе завршиме со капитални расходи во износ од околу 550 милиони евра, но тоа се реални капитални расходи“, нагласи министерката.

Министерката Гордана Димитриеска-Кочоска вели дека Владата обезбедила 500 милиони евра за навремена отплата на еврообврзницата во јануари. 

„Во Будимпешта потпишавме договор за заем од 500 милиони евра под поволни услови со унгарската „Експорт-импорт банка“. Со овие средства обезбедуваме целосна и навремена отплата на обврските кои доспеваат во јануари 2025 година по основ на еврообврзницата. Нашата цел е стабилност и сигурност на јавните финансии, со одговорен пристап кон управувањето со државниот долг“, вели Димитриеска-Кочоска. 

Иако, опозицијата се обидува да покаже дека сликата е сива и дека власта не успева да се снајде со финансиите, дека го крши законот со тоа што се пробива пропишаниот рок од 30 до 60 дена за поврат на ДДВ кон компаниите, министерката Димитриеска-Кочоска рече дека повратот на ДДВ доцни кај фирмите затоа што се прават проверки дали имало фиктивни злоупотреби. 

„Има компании со проневерени пријави. Треба повторно да ги прифаќаме фиктивните фактури и да го финансираме криминалот? Вашата игра беше фиктивни фактури, фантомски фирми, непостоечки жители од Косово, од Бугарија и од Турција, затворање компании итн. Сето тоа е детектирано и тука е проблемот. Таму каде што има спорни ситуации, има отворени предмети. Додека не се затворат предметите од надлежните институции, логично е дека не може да има поврат на ДДВ. Тоа требаше и вие да го правите, а не само ние“, рече министерката за финансии Димитриесска-Кочоска. 

„Нема да дозволам трансфери од Буџетот како во минатото и ќе работиме на поинаков начин! Средствата ќе им се префрлаат на општините по реализацијата на проектите. Исто така, и средствата наменети за компаниите ќе се префрлаат парцијално кон Развојната банка, а оттаму кон деловните банки. Ако има вистински инвестиции, тогаш може да зборуваме за префрлање на средствата“, посочи министерката.

Порача дека редовно се врши и повратот на ДДВ, кој изнесува над 2 милијарди денари на месечно ниво. 

„Онаму каде што имало проневера и е отворена постапка, не може да се врши поврат“, наведе таа и истакна дека се отворени постапки и по однос на други прашања.

Бизнис-заедницата со оптимизам за Буџетот за 2025 година, во кој вкупните приходи се планирани на ниво од 358,8 милијарди, а расходите на ниво од 400,2 милијарди денари. Буџетскиот дефицит е проектиран во апсолутен износ од 41.350 милиони денари, односно на 4 проценти од БДП, а планираниот раст на економијата е 3,7 проценти.  

„Конечно, одиме кон таа работа – развоен буџет. Јас претставувам дека компании кои се моќни и финансиски консолидирани и кои имаат потреба од раст, тие се заинтересирани за нови инвестициони циклуси, а тоа со овој буџет го насетуваат дека ќе се случи. Второ, ние сите треба да бидеме максимално определени, и владата и бизнисот и сите чинители, дека отворање на нов инвестициски циклус значи и подобар живот за граѓаните, фирмите, за државата“, вели претседателот на Стопанските комори, Бранко Азески.

Од голема корист за стопанството е и унгарскиот кредит наменет за бизнисот, за кој Владата и банкарскиот сектор успеаја да се договорат за каматата која треба да ја исплатат фирмите. Договорот што го постигнаа е каматна стапка од 1,95 проценти, до три години грејс период и до 15 години рок на отплата во зависност од потребите на компаниите. За Владата ова е историски договор со историска најниска каматна стапка. 

„Јас сум втора генерација во бизнис-секторот кај мене во семејството. Татко ми ја основа компанијата и ние во триесет и нешто години корпоративно ниеднаш немаме користено кредит за нашата фирма со рочност од 15 години. 1,95 проценти – до сега не ни се има случено да платиме толку ниска камата. Дефинитивно кредитот според овие параметри е повеќе од поволен“, истакна претседателот на Сојузот на стопанските комори, Трајан Ангеловски. 

Според министерката, треба да се работи на подобрување на целокупниот животен стандард на граѓаните, што не опфаќа само раст на плати и пензии, туку вклучува и подобри услови во образованието, здравствениот сектор и инфраструктура. 

„Платите во јавниот сектор ќе се усогласат согласно законските прописи и за тоа се предвидени средства. А во контекст на склучувањето колективни договори, одобрени се онаму каде што буџетските корисници предвиделе средства за раст на платите во рамки на одобрените лимити“, појасни министерката Димитриеска-Кочоска. 

Владата подаде рака за дијалог со синдикатите и со работодавачите, заеднички да носат одлуки во интерес на граѓаните. Заложбата и политиката е велат да создадат иднина за сите, да ги донесат промените и да ја вратат Македонија на правилната патека. „Економијата е нашиот приоритет“, порачаа од Владата.