Во време на дигитализација и наплив од достапни информации, почнуваме нов проект за да го вратиме пишаниот збор во фокус на идните генерации. Денеска можеме се да прочитаме на интернет, но поважно е професионално и стручно да ги разбереме причините зошто тоа се случило. Општество кое не се менува не можеме да кажеме ни дека напредува. Инвестирајте во образование, знаење, учете секој ден и читајте повеќе. Во МАГАЗИНОТ за Туризам и Менаџмент ќе можете да прочитате атрактивни интервјуа, анализи базирани на факти и бројки, компарација на Македонија со европските земји. Ќе ви ги пренесеме убавините на нашата татковина, а од блиску ќе можете да се запознаете и со академската фела од нашиот Универзитет за Туризам и Менаџмент, кој 16 години се труди и успева да ги следи и применува современите високо образовни трендови. Во нашиот МАГАЗИН ќе ви пренесеме успешни животни приказни, кои ќе бидат пример за инспирација и поттик за новото живеење. Не е важно која ќе биде вашата животна професија, важна е подготвеноста за нови знаења и вештини. Образованието е еден од столбовите на државата. Изминативе децении нашиот образовен систем стана поле на кое постојано се менуваат работите, но не на конзистентен начин и како резултат на реализација на одредена долгорочна државна стратегија за која е постигнат консензус. Кога секој ќе си ја знае својата улога во општеството и во организациите и ќе имаме компетентни луѓе на клучни позиции тогаш нашата Македонија цврсто ќе чекори напред.
Со почит,
проф. д-р Аце Миленковски
