Светот се промени, променети се и луѓето и перцепцијата на реалноста, променети се и навиките. Со секое вклучување на некој интернет-портал, првенствено читате текстови што изобилуваат со негативен набој, колумни во кои максимално се гледа да се оцрни некој без оглед дали добро се познава или дали има воопшто вистина во пишаното.
Само да се плукало, без факти, без аргументи, без никакво човечко достоинство. Луѓето се навикнаа да ги проценуваат ситуациите од око, односно да го перципираат само она што го гледаат.
Тоа беше евидентно и со присуството на премиерот Мицкоски на инаугурацијата на Трамп во Вашингтон. Станува многу очигледно дека во време кога светот е пред големи промени, ние како општество не сме подготвени да се поместиме ниту за милиметар.
Многу е грда слика да се омаловажуваме самите како држава во смисла дека сме неважни во тоа опкружување. Една земја е голема или мала, не само според територијални, економски, природни, воени и други показатели и ресурси. Во очите на другите се цени, пред сѐ, според почитта што ја искажуваат кон неа нејзините граѓани.
Затоа, да се почитуваме дома, за да нѐ ценат и надвор. Само така со заеднички сили, сплотени ќе ѝ донесеме просперитетна иднина на нашата Македонија.
