Ни ги отворавте вратите кон светот на знаењето и успехот, поттикнавте во нас лидерство, нè научивте дека нема граници за оние кои имаат храброст за високи цели, нè инспириравте да се стремиме кон извонредност. Нашите постигнувања се одраз на вашите неуморни напори и ја потврдуваат позицијата на Универзитетот Скопје како симбол на квалитетно образование. Успешната приказна на Универзитетот Скопје ќе ја раскажуваме секогаш и секаде. Вака го започнаа својот инспиративен говор Анастасија Иванова и Мартина Нанева, првата прогласена за најдобар магистер, а втората за најдобар дипломец на генерација, на свечената промоција на 16-та генерација дипломци и 14-та генерација магистри од Универзитетот Скопје.
Со полни срца и длабока благодарност, тие ја истакнаа важноста на посветеноста и поддршката од своите професори и асистенти, кои го обликуваа нивниот образовен пат и ги насочија кон нови височини. Двете упатија огромна благодарност до Универзитетот Скопје за беспрекорната поддршка на патот кон успехот.
„Со секое предавање, со секој проект што го работевме заедно, Вие, ректоре, Вие професори и асистенти, ни ги отворавте вратите кон светот на знаењето и успехот, водејќи нè кон највисоките врвови“, кажа пред преполната сала во Македонската опера и балет, избраната најдобра магистерка Анастасија Иванова.
„Вие, кои не само што ги исполнивте нашите очекувања, туку и ги надминавте, поттикнавте во нас лидерство, дадовте форма на нашите вредности и ги издигнавте нашите амбиции. Нè учевте дека успехот не се мери само во резултатите, туку и во интегритетот, во посветеноста кон принципите и во одважноста да сонуваш големи соништа. Вие сте тие кои нè научивте дека нема граници за оние кои имаат храброст да постават високи цели и да ги следат со срце“, изјави Иванова.
Ние сме горди магистри на Универзитетот Скопје, кажа Иванова, затоа што нашата диплома е препознатлива насекаде во светот, а успешната приказна ќе ја раскажуваме секогаш и секаде.
„Универзитет Скопје, Вие и ние, сме препознатлив, цврсто позициониран бренд во високото образование на глобално ниво. Вие нѐ брендиравте со моќта на знаењето и од денес ние сме БРЕНД-АМБАСАДОРИ на Универзитетот Скопје. Успешната приказна за нашите мисли, импресии, за нашите силни емоции ќе ја раскажуваме секогаш и секаде, затоа што Вие од нас создадовте уникатен модел на исклучително квалитетни и конкурентни професионалци. Вечерва е нов почеток на нашата соработка во нови области, од нов аспект, како дел од Алумни-асоцијацијата на Универзитетот Скопје“, изјави Иванова.
Најдобрата магистерка Иванова на крајот од својот говор испрати силна порака и апел, да се зачуваат и да се развиваат сите вредности што оваа високообразовна институција им ги дарува на своите студенти.
„Да ги зацврстуваме со мудроста на нашиот ум и да ги облагородуваме со силата на нашиот глас. Нашиот императив не е само да го носиме знаењето што го стекнавме, туку да го развиваме, да го споделуваме, да бидеме носители на новите европски идеи и решенија, да останеме во нашата ТАТКОВИНА МАКЕДОНИЈА, да не се покоруваме на притисоците, да создадеме јака основа за нашите идни генерации и за светот во кој сакаме да живееме. Затоа, да останеме верни на овие принципи, со отворено срце и ум, со визија која го надминува секој хоризонт, да продолжиме да чекориме по патот што ни беше покажан – пат кој ја води нашата татковина и сите нас во глобалното семејство на културни и едуцирани народи. Воедно на Универзитетот Скопје како етаблиран лидер во високото образование му посакуваме уште многу успешни генерации дипломци и магистри“, кажа на крај Иванова.
Мартина Нанева, најдобар дипломец на Универзитетот Скопје.
Најдобрата дипломка од Универзитетот Скопје, Мартина Нанева, пред пристутните на Свечената промоција кажа дека ова е славје на врвот на соништата што ги негувале и напорите што ги вложиле од моментот кога за првпат зачекориле на Универзитетот Скопје.
„Секој студент го посакува овој ден, денот кога гордо ја држиме нашата диплома. Но, ова патување не беше едноставно — бараше истрајност, посветеност, и пред сè, непроценлива поддршка од извонредни професори и асистенти, кои беа наши ментори низ целиот овој образовен период. Нивната безрезервна поддршка и заложба ни овозможија да стигнеме до овој важен момент. За тоа сме длабоко благодарни“, изјави Нанева.
Во името на сите дипломирани студенти, таа упати најдлабока благодарност до сите професори и асистенти.
„Вие, не само што ни пренесовте знаење и вештини, туку нè инспириравте и да се стремиме кон извонредност. Нашите постигнувања се одраз на вашите неуморни напори и ја потврдуваат позицијата на Универзитетот Скопје како симбол на квалитетно образование, како во нашата земја, така и на меѓународно ниво. Знаењето што го стекнавме тука ни овозможува не само да ја продлабочиме нашата стручност, туку и да направиме значаен придонес кон развојот на македонското општество и економија, претставувајќи ја вредноста и потенцијалот на нашиот универзитет“, потенцираше Нанева.
На крајот, Нанева упати порака дека Универзитетот Скопје и понатаму ќе остане водечка сила во македонското високо образование. Тој ќе остане пример за институција која се стреми кон извонредност и ќе привлече уште поголем број студенти кои ќе посакаат да учат од најдобрите.
„Во името на сите дипломирани студенти, сакам посебно да му се заблагодарам на ректорот, проф. д-р Аце Миленковски, и неговиот тим, за нивната посветеност и визија која ни го отвори патот кон иднината.
Горди сме што од денес ги имаме и ги претставуваме стекнатите знаења и добиените дипломи од Универзитетот Скопје и како што зачекоруваме во светот, ветуваме дека ќе ја чуваме и унапредуваме извонредноста што ја претставува овој универзитет“, изјави Нанева.
Дипломците и магистрите, откако ги добија своите дипломи, му се заблагодарија на академскиот кадар за нивната посветеност и професионалност. По завршувањето на свечениот дел, сите дипломци и магистри заеднички се фотографираа и традиционално ги фрлија капите во воздух. Оваа церемонија го означи крајот на студирањето и почетокот на ново поглавје во нивниот живот.
