Скијачките центри – симбол на снежната магија

Точно на стартот на декември, македонските планини се разбудија под снежна покривка. Снегот како добредојден за старт со зимските спортови, кои секоја година почнуваат сѐ подоцна и подоцна, главно поради неповолните климатски услови. Сепак, вљубениците во скијањето веднаш побрзаа да спортуваат. Концесионерите на скијачките центри се надеваат дека оваа сезона ќе трае што е можно подолго.

По подолг период, во земјава ќе се отвори нов скијачки центар. Повторно на планината Кожуф, но овој пат не од гевгелиска, туку од кавадаречката страна. Поточно во Михајлово, каде што сѐ уште успешно функционира детското одморалиште. Градоначалникот на Кавадарци, Митко Јанчев, уште летово објави дека планира да го заврши најавениот проект во предизборната програма, а тоа е изградба на скијачка патека во Михајлово. Проектот стартуваше уште пред пет години, завршена е целокупната потребна документација, добиени се сите дозволи за да може да се реализира проектот. 

Кон крајот на август, Советот на општина Кавадарци одговори позитивно на барањата на компаниите „Кожувчанка“ и „Комерцијална банка“ да донираат финансии за изградба на скијачкиот центар. Донацијата изнесува 231.660 евра, од кои 115.000 евра се донација од „Комерцијална банка“ и 115.000 евра се средства донација од „Кожувчанка“.

Оваа донација е во материјални добра и услуги: скилифт во должина од 370 м со капацитет од 600 лица на 1 час, скијачки појас со капацитет од 800 лица, четири сезонски вртелешки, мобилна пумпа, црева со висок притисок (5 по 20 метри, мах од 20 бари), 4 филтри, 4 хидранти, 2 снежни топа и 20 заштитни мрежи.

„Предност е тоа што имаме скијачка стаза во должина од 400 метри, која ќе можат да ја користат од најмладите до највозрасните. Подготовката на патеката е целосна донација од фирмата ,ЈА-МИ‘, во висина од 50.000 евра. Во склоп на патеката ќе добиеме и акумулација, вештачко езерце кое ќе го наполниме со 6.000 метри кубни вода за потребата на самата патека, оние три топа што ги имаме купено да ги снабдуваме со вода за правење на вештачки снег, за да може патеката да биде функционална и да може подолг период да се користи“, рече градоначалникот на Кавадарци, Митко Јанчев, при увидот во градежните работи.

Одлучено е со скијачкиот центар да стопанисува Спортскиот центар „Јасмин“, а општинскиот Совет ќе ја утврди висината на картата. Исто така, скијачката стаза ќе биде осветлена и ќе работи и во вечерните часови. Веќе се поставија 18 столба во висина од 10 метри за осветлување, на кои се поставени по 2 лед-рефлектори од по 200W на скијачката патека и 1 столб со 4 лед-рефлектори од 200W за осветлување на теренот. Во моментов се поставува скилифтот како и останатата опрема, со што проектот е во завршна фаза и се очекува да биде отворен до крајот на овој месец.

Инаку децата на возраст до 14 години ќе можат да изнајмат скии бесплатно. На располагање ќе имаат 200 пара скии (користени скии) набавени од Австрија. Градоначалникот Јанчев вели дека во проектот ќе бидат вклучени сите наставници по физичко образование, кои ќе можат да ги учат децата да скијаат на оваа патека. Истата стаза може да работи и во летниот период, со тоа што ќе бидат поставени гуми наменети за авантуристички туризам.

„Кавадарци се наоѓа на 300 метри надморска височина и ретко има снег или тој не се задржува. Затоа овде на Кожуф има снег речиси преку цела година, се наоѓа на некои 35 километри од Кавадарци. Се направи и патот и мислам дека со половина час до 45 минути патување, секое семејство може да дојде да ужива во овие услови овде“, вели Јанчев. 

Очекувањата се дека оваа нова скијачка дестинација ќе продолжи да се развива понатаму со дополнување на содржините, како на пример, капацитети за сместување туристи и отворање ресторански и други угостителски капацитети.

паднати дрвја. Јанчев вели дека патот редовно се одржува и дека особено ќе се обрне внимание во зимските месеци кога трае скијачката сезона. 

„Ќе имаме дополнителна зимска служба 24 часа со две возила, ќе имаме болничко комбе, ќе има моторна санка, така што сите безбедносни услови и патот да биде прооден ќе бидат обезбедени максимално“, вели Јанчев. 

Традиционално, како и секоја година, најмногу снег има на Попова Шапка. Во овој скијачки центар кон средината на декември и официјално стартуваше скијачката сезона. На првиот официјален ден од сезоната, на Попова Шапка со јавен градски автобус, пристигна и градоначалникот на Тетово, Биљал Касами. Поради метежот кој е присутен секоја година на тесниот пат кон Шапка, тој ги замоли граѓаните да ги остават автомобилите дома и да ја користат автобуската линија која треба да биде редовна во текот на викендите. Патниците ќе се превезуваат со автобуси на Јавното претпријатие „Тетово транспорт“, а цената за повратен билет изнесува 200 денари. 

„Оваа линија ќе биде во функција секоја сабота и недела и очигледно ќе влијае не само на зголемување на бројот на туристи, туку и на олеснување на сообраќајот на овој патен правец. Патниците ќе се превезуваат со автобуси на ,Тетово транспорт‘, со што граѓаните ќе можат полесно да патуваат до овој туристички центар. Евентуално, доколку настане хаос во сообраќајот, автобусите ќе застанат на местото викано Сидол, од каде ќе се врши превоз со комбиња до крајната дестинација“, информираа од Општина Тетово.

Од Тетово до Попова Шапка автобусите ќе тргнуваат во 8, 10, 12 и 15:30 часот, а во градот ќе се враќаат еден час подоцна од овие термини. Недостигот од паркинг-места останува и натаму голем проблем во туристичкиот центар.

Од скијачкиот центар велат дека се подготвени за многубројните посетители, скилифтовите и жичарниците се во функција, а првите гости веќе се на скијачките патеки. 

Висината на снегот на Попова Шапка е над 40 сантиметри. Оваа сезона од угостителските објекти кои се во сопственост на скијачкиот центар ќе работи само хотелот „Славија“, додека хотелот „Попова Шапка“ е затворен и надвор од употреба, a ќе работат и неколку приватни хотели.

Дневен билет за скијање чини 1.100 денари. Цените на сезонските билети варираат зависно од возраста, а се движат од 12.000 за најстарите, 13.000 за децата од 6 до 14 години, 16.000 за лица до 24 години и 19.000 за луѓе од 25 до 62 години.

„Од сабота (14.12) скијачкиот центар ќе има редовни цени и редовно работно време. По многубројните подготвителни активности, сега сме подготвени да понудиме незаборавно искуство за љубителите на зимските спортови. Благодарение на тимот и на нивната неуморна работа, скијачките патеки се подготвени за зимските активности“, вели директорот на туристичкиот центар, Абдулгани Алији.

Скијањето на Маврово почна на 5. декември. Висината на снежната покривка е 48 сантиметри. Дневното скијање функционира од 8 до 16 часот. Дневна карта чини 1.500 денари, децата до 13 години плаќаат 1.050 денари, а оние до 23 години 1.250 денари. Дводневна карта чини 2.600 денари, а за три дена 3.700 денари. Сезонските билети чинат 21.000 денари, а карта за ноќно скијање 900 денари. 

Оваа година, скијачкиот центар Маврово ја промовира сезонската скикарта од ресорт „Маврово“ за сезона 23/24 како можност да скијате на повеќе планини. Па така, со сезонската карта ќе можете да скијате три последователни дена ГРАТИС во Копаоник (Србија), Торник (Златибор) и Стара Планина, Колашин (Црна Гора), Олимписки центар Бјелашница и Игман (Босна и Херцеговина) и Олимписки центар Јаxорина (Босна и Херцеговина).

Речиси секоја година се случува патот до и од Маврово да остане непрооден поради силни наноси од снег или, пак, одрони и лизгање на земјиштето. Така беше и годинава. На самиот старт на декември, поради првиот поголем налет на снег, патиштата останаа блокирани, па многумина кои сакаа да го поминат првиот викенд од декември во Маврово, не можеа да се вратат дома. Конвој од 25 возила со мали деца и трудници остана заглавен на патот од Леуново кон Бунец. Општината Маврово и Ростуше се иззема од одговорност. Таа ги информирала своите жители дека патот што води од браната „Маврово“, преку селата Маврово, Ниќифорово и Леуново околу езерото, сè до приклучокот кај м.в. Бунец е регионален пат и е во надлежност на ЈП „Македонија пат“. Гости од хотелот „Радика“ во Маврово што беа заглавени поради обилните врнежи од снег и непроодниот пат, беа извлечени со помош на специјално возило на Јавното претпријатие за одржување и заштита на магистралните и регионалните патишта.

На Баба Планина, има два скијачки центри кои активно функционираат: Копанки кој го управува ЕСМ „Молика“, како и Нижеполе со кој стопанисува Јавното претпријатие „Стрежево“. На падините на Баба има малку сместувачки капацитети, но во Битола може да се најде поголема понуда, и тоа почнувајќи од 1.000 денари за еден ден за двајца.

Копанки почна со работа на 7 декември. Пред стартот на сезоната, се реновираа корпите на жичарата со  бојадисување и заменување на дрвените подлоги за седење. Од темел се изгради нова куќарка за скилифт по цели 40 години.

Од ЕСМ „Молика“ велат цените се приспособени на економските состојби. Дневен билет за деца е 300 денари и 500 за возрасни, а сезонскиот билет чини околу 6.000 денари. Освен на ценовникот, посебно внимание е посветено и на безбедноста на скијачите.

Од 4 декември и официјално почна скијањето на скијачкиот центар Нижеполе, информираа од ЈП „Стрежево“. Оттаму потврдуваат дека скијачките патеки се максимално подготвени за дневно, но и за ноќно скијање, и дека патот до центарот е прооден, а паркинзите и детскиот дел се исчистени од снежните наноси. Цената на дневната карта останува иста како и лани, 500 денари за возрасни и 300 денари за деца до 14 години. Сезонската карта чини 5.000, односно 3.000 денари. За ноќно скијање ќе треба да се одвојат 400 денари. 

„Цените за топол чај и кафе, како и картите за скијање се исти како и минатата сезона. Кога ги имаме, максимално да ги искористиме благодетите на природата е нашата порака до сите вљубеници во зимските спортови и зимското рекреирање. Ве очекуваме!“,  порачуваат од ЈП „Стрежево“ од Битола.

Скијачкиот центар Нижеполе претставува вистинско уживање за љубителите на планината, белите спортови и зимата со целата нејзина раскош и убавина. Навистина, битолчани и сите други гости имаат одлична и неповторлива шанса за уживање и рекреација.